नेपालमा बालबालिकामा कुष्ठरोगका घटना बढ्दै गएको तथ्य सार्वजनिक भएको छ। हालै सार्वजनिक तथ्याङ्कअनुसार देशभर रहेका कुल २ हजार ४ सय ९ जना कुष्ठरोगीमध्ये १ सय ५४ जना बालबालिका रहेको पाइएको छ। बालबालिकामा नै सङ्क्रमण देखिनु स्वास्थ्य क्षेत्रका लागि गम्भीर चिन्ताको विषय बनेको छ।
यस विषयलाई लिएर सरकारले उच्च प्राथमिकताका साथ नियन्त्रण अभियान अघि बढाउने प्रतिबद्धता जनाएको छ। नेपाल कानून समाजले आयोजना गरेको कार्यक्रममा बोल्दै कानून, न्याय तथा संसदीय मामिला मन्त्रालयका सचिव पाराश्वर ढुङ्गानाले बालबालिकामा रोग देखिनु अत्यन्तै संवेदनशील विषय भएको बताउनुभयो। उहाँले मानव अधिकारको दृष्टिकोणबाट समेत कुष्ठरोग उन्मूलन अपरिहार्य रहेको उल्लेख गर्नुभयो।
त्यस्तै, स्वास्थ्य तथा जनसङ्ख्या मन्त्रालयका सचिव डा. विकास देवकोटाले नेपालले सन् २०१० मा कुष्ठरोग निवारणको घोषणा गरे पनि हाल १६ जिल्लामा प्रति १० हजार जनसङ्ख्यामा एकभन्दा बढी बिरामी भेटिनु चिन्ताजनक रहेको बताउनुभयो। उहाँका अनुसार परिवारमा उपचार ढिला हुँदा बालबालिकामा संक्रमण सर्ने जोखिम बढिरहेको छ।
उहाँले बहुक्षेत्रीय समन्वय, छिटो पहिचान तथा समयमै उपचारलाई प्राथमिकता दिनुपर्नेमा जोड दिनुभयो। कार्यक्रममा सहभागी विज्ञहरूले कुष्ठरोगलाई राष्ट्रिय प्राथमिकतामा राखी युद्धस्तरमा अभियान सञ्चालन गर्नुपर्ने साझा निष्कर्ष निकालेका छन्।
