काठमाडौँ । प्रधानमन्त्री सुशीला कार्कीले सरकारको प्राथमिकता मानव अधिकारलाई संस्थागत गर्नु र आगामी फागुन २१ गते हुने प्रतिनिधिसभा सदस्य निर्वाचन शान्तिपूर्ण रूपमा सम्पन्न गर्नु रहेको बताउनुभएको छ।
संयुक्त राष्ट्रसंघीय मानव अधिकार परिषद्को उच्चस्तरीय बैठकलाई सम्बोधन गर्दै प्रधानमन्त्री कार्कीले सङ्क्रमणकालीन न्याय प्रक्रियालाई पीडितमैत्री र विश्वसनीय तरिकाले टुङ्ग्याउन नेपाल प्रतिबद्ध रहेको उल्लेख गर्नुभयो।
सन् २०२६ का लागि परिषद्को अध्यक्षमा निर्वाचित हुने व्यक्तिहरूलाई बधाई दिनुभएका प्रधानमन्त्री कार्कीले विश्वले सामना गरिरहेका जलवायु परिवर्तन, द्वन्द्व र विपद् जस्ता जटिल चुनौतीहरूबीच मानव अधिकारको विश्वव्यापी संरक्षणलाई सुनिश्चित गर्नुपर्नेमा जोड दिनुभयो।
प्रधानमन्त्री कार्कीले प्रतिनिधिसभा सदस्य निर्वाचन स्वतन्त्र, निष्पक्ष र पारदर्शी रूपमा सम्पन्न गर्न सरकारले आवश्यक सबै शक्ति परिचालन गरिरहेको जानकारी पनि दिनुभयो।
