काठमाडौँ — गृह मन्त्रालयले चुनाव विरोधी गतिविधिमा संलग्न भई शान्ति सुरक्षामा असर पुर्याउने जो–कोहीलाई कानुनी दायरामा ल्याइने जनाएको छ।
गृहमन्त्री ओमप्रकाश अर्यालको अध्यक्षतामा तथा गृहसचिव राजकुमार श्रेष्ठसहित सुरक्षा निकायका प्रमुखहरूको उपस्थितिमा हिजो बसेको बैठकले दैनिक रूपमा शान्ति सुरक्षा अवस्था, निर्वाचन तयारी तथा समसामयिक चुनौतीबारे समीक्षा गरेको मन्त्रालयले जनाएको छ।
बैठकमा विभिन्न जिल्लामा चुनाव विरोधी गतिविधि, राजनीतिक दल तथा व्यक्तिविरुद्ध लाञ्छना लगाउने कार्य, टायर बाल्ने, राँके जुलुस निकाल्ने, सार्वजनिक तथा व्यक्तिगत सम्पत्तिमा आगजनी र तोडफोड गर्ने तथा अन्य हिंसात्मक क्रियाकलापमार्फत शान्ति सुव्यवस्थामा गम्भीर असर पुर्याउने घटनाप्रति मन्त्रालयले गम्भीर ध्यानाकर्षण भएको उल्लेख गरिएको छ।
कानुनले निषेध गरेका कुनै पनि गतिविधिमा संलग्न व्यक्तिलाई कानुनी कारबाही गरिने स्पष्ट पार्दै मन्त्रालयले निर्वाचनलाई शान्तिपूर्ण, सुरक्षित र निष्पक्ष वातावरणमा सम्पन्न गराउन सुरक्षा निकायलाई आवश्यक निर्देशन दिइएको जनाएको छ।
