पर्सा– प्रतिनिधिसभा सदस्य निर्वाचनलाई सुरक्षित, निष्पक्ष तथा व्यवस्थित रूपमा सम्पन्न गराउने उद्देश्यले जिल्ला प्रहरी कार्यालय पर्साले जिल्लाका १६७ मतदानस्थलमा सिसी क्यामेरा जडान गर्ने भएको छ।
कार्यालयका प्रवक्ता तथा प्रहरी नायब उपरीक्षक हरीबहादुर बस्नेतले निर्वाचन सुरक्षालाई थप प्रभावकारी बनाउन मतदानस्थलहरूमा सिसी क्यामेरा जडान गरी निरन्तर निगरानी गरिने जानकारी दिए। उनका अनुसार फागुन १७ गतेसम्म सबै मतदानस्थललाई सिसी क्यामेरा प्रणालीसँग जोड्ने तयारी गरिएको छ।
प्रवक्ता बस्नेतले सिसी क्यामेरा जडानपछि मतदान प्रक्रियालाई थप सुरक्षित, पारदर्शी र मर्यादित बनाउन सहयोग पुग्ने विश्वास व्यक्त गरे।
निर्वाचन सुरक्षालाई मजबुत बनाउन आवश्यक जनशक्ति परिचालन, नियमित अनुगमन तथा सम्बन्धित निकायसँग समन्वयात्मक कार्यलाई प्राथमिकतामा राखिएको प्रहरीले जनाएको छ।
शान्तिपूर्ण वातावरणमा निर्वाचन सम्पन्न गर्न सबै सरोकारवाला निकाय तथा आम नागरिकलाई सहयोग गर्न पनि प्रहरी प्रशासनले आग्रह गरेको छ।
