वीरगञ्जस्थित मधेश विश्वविद्यालयका एक कर्मचारीलाई छात्रामाथि दुर्व्यवहार (अनैतिक दबाब सिर्जना गरेको) आरोपमा पक्राउ गरिएको छ। प्रशासन शाखामा कार्यरत राजु गद्दीलाई जिल्ला प्रहरी कार्यालय पर्साको टोलीले नियन्त्रणमा लिएको हो।
प्रहरीका अनुसार, गद्दीले एक छात्रालाई अनैतिक सम्बन्धका लागि निरन्तर दबाब दिँदै आएका थिए। उजुरीमा उल्लेख भएअनुसार उनले प्रस्ताव स्वीकार गरेमा परीक्षामा सहयोग गर्ने र अस्वीकार गरेमा ‘मार्क्स घटाइदिने’ तथा अनुत्तीर्ण गराइदिने धम्की दिएका थिए।
पीडित छात्राले सुरुवातमा सहयोगको बहानामा नजिकिएका गद्दीले पछि फोन र सामाजिक सञ्जालमार्फत अनुपयुक्त सन्देश पठाउन थालेको आरोप लगाएकी छन्। प्रस्ताव अस्वीकार गरेपछि उनले शैक्षिक भविष्य नै समाप्त पार्ने चेतावनी दिएको उजुरीमा उल्लेख छ। छात्राले चैत १४ गते उजुरी दर्ता गरेकी थिइन्।
उजुरीपछि फरार रहेका गद्दीलाई प्रहरीले खोजी गरी पक्राउ गरेको हो। पर्सा प्रहरी प्रवक्ता हरिबहादुर बस्नेतले आरोपितमाथि कानुनी प्रक्रिया अघि बढाइएको र घटनाको थप अनुसन्धान जारी रहेको जानकारी दिए।
घटना सार्वजनिक भएसँगै विश्वविद्यालयभित्र अन्य छात्राहरू पनि यस्तै दुर्व्यवहारको सिकार हुन सक्ने आशंका व्यक्त गरिएको छ। शिक्षण संस्थाभित्रै कर्मचारीबाट यस्तो गतिविधि हुनु गम्भीर विषय भएको भन्दै विद्यार्थीको सुरक्षा र शैक्षिक मर्यादामा प्रश्न उठेको छ।
यसैबीच, पक्राउ परेका गद्दी मधेश प्रदेशका पूर्वमुख्यमन्त्री लालबाबु राउतका भतिजो रहेको बताइएको छ, जसले घटनालाई थप चर्चामा ल्याएको छ।
