प्रहरी हिरासतमा रहेका व्यक्तिहरूलाई धरौटीमा छुटाइदिने बहाना बनाई ठगी गरेको आरोपमा दुई जना पक्राउ परेका छन्।
पक्राउ पर्नेमा काठमाडौं महानगर क्षेत्रको बूढानीलकण्ठ नगरपालिका मण्डिखाटारस्थित हलेसी महादेव मार्ग आसपास बसोबास गर्ने ४५ वर्षीय हरिबहादुर थापा मगर र उनकी श्रीमती ३७ वर्षीया मिठु मगर (अनिता थापा मगर) रहेका छन्।
प्रहरीका अनुसार भदौ २३ र २४ गते भएको प्रदर्शनका क्रममा आपराधिक गतिविधिमा संलग्न रहेको आरोपमा पक्राउ परेका र हाल सुनधारा कारागारमा पुर्पक्षका लागि थुनामा रहेका तीन जना प्रतिवादीलाई छुटाइदिने भन्दै उनीहरूले ठगी गरेका थिए।
आरोपीहरूले आफूहरूको सर्वोच्च अदालतका न्यायाधीशहरूसँग राम्रो चिनजान रहेको र ‘सेटिङ’ मिलाएर धरौटीमा रिहा गराउन सकिने दाबी गरेका थिए। सोही बहानामा धरौटी रकम तथा वकिल खर्चको नाममा पीडितसँग ९ लाख रुपैयाँ मिठु मगरको बैंक खातामा जम्मा गराइएको प्रहरीले जनाएको छ।
रकम बुझाएपछि पनि प्रतिवादीहरू छुट्न नसकेपछि पीडितले शंका व्यक्त गरेका थिए। अनुसन्धानका क्रममा ठगी पुष्टि भएपछि प्रहरीले दुवै जनालाई मण्डिखाटार क्षेत्रबाट नियन्त्रणमा लिएको हो।
प्रहरीले घटनाबारे थप अनुसन्धान भइरहेको जनाएको छ।
