पर्साको जिराभवानी गाउँपालिकामा कुटपिटको शिकार बनेर एक वृद्ध महिलाको मृत्यु भएको छ।
गाउँपालिका–१ पिपरा टोलकी ५५ वर्षीया सायदा श्रीवास्तव आफ्नो बुहारीको कुटपिटबाट आज दिउँसो मृत्युवरण भएकी हुन्।
घटनामा संलग्न रहेको आरोपमा प्रहरीले मृतककी बुहारी २६ वर्षीया पिंकी देवी र उनका आफन्त १६ वर्षीया गायत्री कुमारीलाई नियन्त्रणमा लिएको छ। ईलाका प्रहरी कार्यालय पटेर्वा सुगौलीले उनीहरूलाई नियन्त्रणमा लिएर थप अनुसन्धान गरिरहेको प्रहरी निरीक्षक समुन्नत अधिकारीले जानकारी दिनुभयो।
स्थानीयबासीले बताएअनुसार मृतक सायदा र उनकी बुहारीबीच लामो समयदेखि विवाद हुँदै आएको थियो। प्रारम्भिक अनुमान अनुसार यही विवादका कारण घटना भएको देखिन्छ।
मृतकको शव पोस्टमार्टमका लागि नारायणी अस्पताल पठाइएको छ भने घटनाबारे थप अनुसन्धान जिल्ला प्रहरी कार्यालय पर्साले गरिरहेको छ।
