कैलाली । सुदूरपश्चिम प्रदेशका मुख्यमन्त्रीमाथि घुस मागेको आरोप लगाएका एक वन अधिकृतलाई प्रहरीले पक्राउ गरेको छ।
कृष्णदत्त भट्ट लाई जिल्ला प्रहरी कार्यालय कैलालीको टोलीले पक्राउ गरेको हो। उनी वन निर्देशनालय, कैलाली मा कार्यरत वरिष्ठ डिभिजन वन अधिकृत हुन्।
प्रहरीका अनुसार भट्टलाई उद्योग, पर्यटन, वन तथा वातावरण मन्त्रालय, सुदूरपश्चिम प्रदेश बाट पक्राउ गरिएको हो। जिल्ला प्रहरी कार्यालय, कैलाली का प्रवक्ता प्रहरी नायब उपरीक्षक योगेन्द्र तिमिल्सिना का अनुसार भट्टलाई विद्युतीय अपराधसम्बन्धी जाहेरीका आधारमा नियन्त्रणमा लिइएको हो।
मुख्यमन्त्री कमलबहादुर शाह का स्वकीय सचिव प्रयागराज खनाल ले दिएको जाहेरीका आधारमा पक्राउ गरिएको प्रहरीले जनाएको छ। हाल उनलाई जिल्ला प्रहरी कार्यालय कैलालीको हिरासतमा राखिएको छ।
यसअघि भट्टले सञ्चारमाध्यमलाई दिएको एक अन्तर्वार्तामा मुख्यमन्त्री शाहले आफूसँग पाँच लाख रुपैयाँ घुस मागेको र रकम नदिएपछि पूर्वाग्राही भएर आफ्नो सरुवा गरिएको आरोप लगाएका थिए। सोही आरोपपछि वन मन्त्रालयले उनीसँग स्पष्टीकरण पनि मागेको थियो।
