वीरगञ्ज –ग्लोबल मनी वीकको अवसरमा वीरगञ्जस्थित श्री नेपाल रेलवे माध्यमिक विद्यालय मा दुई दिने वित्तीय साक्षरता (फाइनान्सियल लिटरेसी) सम्बन्धी कार्यक्रम सुरु गरिएको छ। कार्यक्रमको आयोजना ज्योति विकास बैंक को वीरगञ्ज शाखाले गरेको हो।
विद्यालयका प्रिन्सिपल प्रभु प्रसाद रौनियार को अध्यक्षतामा सम्पन्न उद्घाटन कार्यक्रममा कक्षा ९ मा अध्ययनरत ६५ जना विद्यार्थीहरूको सहभागिता रहेको थियो। कार्यक्रममा विद्यार्थीहरूलाई वित्तीय ज्ञान, बचतको महत्व, बैंकिङ सेवा प्रयोग गर्ने तरिका तथा डिजिटल बैंकिङबारे जानकारी दिइएको थियो।
कार्यक्रममा ज्योति विकास बैंक वीरगञ्ज शाखाका अधिकृतहरू लक्ष्मण कुमार रौनियार, राहुल बरनवाल र राजा बाबु लगायतले प्रशिक्षण दिएका थिए।
सो अवसरमा बोल्दै अधिकृत रौनियारले विद्यार्थीहरूलाई सानै उमेरदेखि बचत गर्ने बानी विकास गर्नुपर्नेमा जोड दिए। उनले आर्थिक रूपमा सचेत भएमा भविष्यमा व्यक्तिगत तथा पारिवारिक जीवन व्यवस्थापन गर्न सहज हुने बताए। साथै, आधुनिक बैंकिङ प्रणाली, डिजिटल कारोबार र वित्तीय अनुशासनबारे जानकारी हुनु आजको आवश्यकता भएको उनको भनाइ थियो।
विद्यालयका प्रिन्सिपल रौनियारले यस्ता कार्यक्रमले विद्यार्थीहरूमा आर्थिक चेतना बढाउन महत्वपूर्ण भूमिका खेल्ने विश्वास व्यक्त गर्दै आयोजकप्रति आभार व्यक्त गरे।
आयोजकका अनुसार उक्त कार्यक्रम मंगलबारसम्म सञ्चालन हुनेछ।
