वीरगञ्ज – आम जनता पार्टीका केन्द्रीय अध्यक्ष तथा पूर्वमन्त्री प्रभु साहले प्रतिनिधिसभाको समानुपातिक सूचीमा मधेशी दलित समुदायलाई शून्य स्थान दिनुलाई सामाजिक विभेद र दुर्भाग्यपूर्ण घटना भएको बताएका छन्।
अध्यक्ष साहले भने, “दलित समुदायभित्र पनि अझ बढी अपहेलित मधेशी दलितलाई पूर्ण रूपमा बेवास्ता गर्नु सामाजिक न्याय र समावेशी लोकतन्त्रको सिद्धान्त विपरीत हो। यसले मात्र समुदायलाई पछाडि पार्दैन, बरु हाम्रो संवैधानिक व्यवस्थामाथि नै प्रश्न खडा गर्दछ।”
उहाँले नयाँ दल र पुराना दलबीच कुनै फरक नदेखिएको उल्लेख गर्दै, सबैले मधेशी दलितको प्रतिनिधित्व सुनिश्चित गर्न असफल भएको बताए। साहका अनुसार, यो विभेदले देशको लोकतान्त्रिक अभ्यास र संवैधानिक संरचनामाथि गम्भीर चुनौती खडा गरेको छ।
अध्यक्ष साहले सबै राजनीतिक दललाई मधेशी दलितको अधिकार र प्रतिनिधित्व सुनिश्चित गर्न आग्रह गर्दै, राज्यका सबै निकायमा समान अवसर र सम्मानजनक सहभागिता सुनिश्चित गर्न जोड दिएका छन्।
