काठमाडौं — प्रतिनिधि सभाको निर्वाचनमा स्पष्ट बहुमत प्राप्त गर्ने निश्चित भइसकेको राष्ट्रिय स्वतन्त्र पार्टीका बरिष्ठ नेता बालेन्द्र शाह (बालेन) प्रधानमन्त्री नियुक्त भएपश्चात् विश्वासको मत लिनु नपर्ने भएको छ।
निर्वाचनअघि नै पार्टीले बालेनलाई प्रधानमन्त्रीको उम्मेदवार घोषणा गर्दै मत मागेको थियो। त्यसैले पार्टीले उनलाई नै प्रधानमन्त्रीको रुपमा अघि सार्ने विश्वास गरिएको छ।
संविधानको धारा ७६ को उपधारा १ अनुसार कुनै पनि दलले प्रतिनिधि सभामा स्पष्ट बहुमत प्राप्त गरेमा उक्त दलको संसदीय दलको नेता प्रधानमन्त्री नियुक्त हुने व्यवस्था छ। यस्तो अवस्थामा नियुक्त भएका प्रधानमन्त्रीले संसदबाट विश्वासको मत लिनुपर्ने बाध्यात्मक व्यवस्था छैन।
तर, दुई वा सोभन्दा बढी दलको गठबन्धनबाट सरकार गठन भएको अवस्थामा वा कुनै दल सबैभन्दा ठूलो भए पनि एकल बहुमत नआएको अवस्थामा भने प्रधानमन्त्रीले प्रतिनिधि सभाबाट विश्वासको मत लिनुपर्ने संवैधानिक व्यवस्था रहेको छ।
