काठमाडौं — प्रतिनिधिसभा सदस्य निर्वाचन अन्तर्गत काठमाडौं क्षेत्र नम्बर–६ बाट विजयी राष्ट्रिय स्वतन्त्र पार्टी (रास्वपा)का उम्मेदवार शिशिर खनालले मतदाताप्रति आभार व्यक्त गरेका छन्।
सोमबार आफ्नो निर्वाचन क्षेत्रका मतदातासँग भेटघाट गर्दै उनले जनताले विश्वासका साथ मत दिएर ठूलो जिम्मेवारी सुम्पिएको बताए। उनले अब रास्वपालाई असफल हुने कुनै छुट नभएको उल्लेख गर्दै मतदाताले दिएको विश्वासको कदर गर्ने प्रतिबद्धता जनाए।
खनालले भने, “जनताले यति विश्वास गरेर मतका साथै जिम्मेवारी सुम्पिनुभएको छ। अब राष्ट्रिय स्वतन्त्र पार्टीलाई कुनै पनि हालतमा असफल हुने छुट छैन। तपाईंहरूले दिनुभएको मत र अपार विश्वासको कदर गर्दै देशलाई समृद्ध बनाउने दिशामा काम गर्नेछौं।”
उनले देशको प्रमुख चुनौतीमध्ये रोजगारी सिर्जना रहेको बताउँदै पार्टीले आगामी पाँच वर्षभित्र १२ लाख रोजगारी सिर्जना गर्ने लक्ष्य लिएको जानकारी दिए। संसदमा रास्वपाको उल्लेखनीय उपस्थिति भएकाले पुराना र काम नलाग्ने कानुनहरू खारेज गरी आवश्यकताअनुसार नयाँ कानुन बनाउन कसैले रोक्न नसक्ने पनि उनले दाबी गरे।
काठमाडौं–६ बाट खनाल २७ हजार ७११ मत प्राप्त गर्दै प्रतिनिधिसभा सदस्यमा निर्वाचित भएका हुन्।
