काठमाडौं — आयतुल्लाह अली खामेनीको निधन भएको इरानको सरकारी टेलिभिजनले पुष्टि गरेको छ। राज्य टेलिभिजनका एक प्रस्तोताले भावुक हुँदै सर्वोच्च नेता खामेनीको मृत्यु भएको घोषणा गरेका हुन्। उनको निधनमा ४० दिन राष्ट्रिय शोक घोषणा गरिएको जनाइएको छ।
यसअघि डोनाल्ड ट्रम्पले आफ्नै सामाजिक सञ्जाल प्लेटफर्म Truth Socialमार्फत खामेनी मारिएको दाबी गरेका थिए। तर त्यसबेला इरानबाट औपचारिक पुष्टि हुन सकेको थिएन।
घटनाबारे प्रारम्भिक चरणमा इरानका विदेशमन्त्री अब्बास अराघचीले अमेरिकी सञ्चारमाध्यम NBC Newsसँगको अन्तर्वार्तामा आफ्ना सर्वोच्च नेता सुरक्षित र स्वस्थ रहेको बताएका थिए।
तर पछिल्लो विकासक्रममा इरान राज्य टेलिभिजनले खामेनीको निधन भएको औपचारिक जानकारी दिएको हो। यसबारे थप विवरण आउन बाँकी रहेको बताइएको छ।
खामेनी सन् १९८९ देखि इरानका सर्वोच्च नेताका रूपमा कार्यरत थिए। उनको निधनसँगै इरानको राजनीतिक अवस्थाबारे चासो बढेको छ।
