काठमाडौं — प्रेस काउन्सिल नेपालले आगामी प्रतिनिधिसभा सदस्य निर्वाचनसँग सम्बन्धित सामग्री प्रकाशन, प्रसारण वा सम्प्रेषण गर्दा सावधानी अपनाउन आग्रह गरेको छ। काउन्सिलले मतदातालाई दिग्भ्रमित पार्ने, दल वा उम्मेदवारको नकारात्मक छवि सिर्जना गर्ने वा निष्पक्ष मतदानमा असर पार्ने खालका सामग्रीबाट बच्न पत्राचार गरेको हो।
बैठकले चुनावको संवेदनशीलताबारे चर्चा गर्दै विदेशी सञ्चारमाध्यम, विशेषगरी बीबीसी जस्ता स्रोतबाट प्रसारित सामग्रीले निर्वाचन प्रक्रियामा प्रभाव पार्ने सम्भावना भएकाले नियमन र समन्वयका लागि नेपाल सरकार तथा निर्वाचन आयोगसँग कूटनीतिक माध्यममार्फत प्रक्रिया अघि बढाउन अनुरोध गर्ने निर्णय गरेको काउन्सिलले जनाएको छ।
प्रेस काउन्सिलले निर्वाचनको समयमा सूचनाको पारदर्शिता र निष्पक्षतालाई सुनिश्चित गर्न मिडियालाई जिम्मेवार र सचेत भएर कार्य गर्न निर्देशन दिएको छ।
