पर्सा। फागुन २१ गते निर्धारित प्रतिनिधिसभा सदस्य निर्वाचन नजिकिँदै गर्दा पर्सा निर्वाचन क्षेत्र नम्बर–२ मा चुनावी माहोल उच्चतम स्तरमा पुगेको छ। राजनीतिक दल तथा उम्मेदवारहरूले आफ्नो–आफ्नो क्षेत्रमा सक्रिय अभियान चलाउँदै मतदातासँग प्रत्यक्ष सम्पर्क गर्न, घरदैलो, टोलभेला, कोणसभा र विकास एजेन्डा प्रस्तुत गर्नमा विशेष ध्यान दिएका छन्। निर्वाचन नजिकिँदै गर्दा मतदातासँगको प्रत्यक्ष संवादलाई प्राथमिकता दिँदै उम्मेदवारहरूले आफ्नो प्रतिबद्धता र विकास योजनालाई उजागर गर्दै आएका छन्।
यसैबीच, राष्ट्रिय प्रजातन्त्र पार्टी (राप्रपा) की उम्मेदवार बीना जैसवाल कुर्मीले पर्सा–२ क्षेत्रमा आफ्नो चुनावी अभियानलाई तीव्र बनाएकी छिन्। कुर्मीले वीरगञ्ज महानगरपालिका वडा नं. २८ बगही–दरदरवा इनर्वामा व्यापक घरदैलो कार्यक्रम सम्पन्न गर्दै स्थानीय मतदातासँग प्रत्यक्ष संवाद गरेकी छिन्। घरदैलो तथा टोलभेला कार्यक्रममार्फत उनले आफ्नो चुनावी एजेन्डा सार्वजनिक गर्दै विकासका प्राथमिकता, योजनाहरू र प्रतिबद्धताका विषयमा विस्तृत जानकारी गराएकी छिन्।
कुर्मीले यस अवसरमा सडक स्तरोन्नति, खानेपानी व्यवस्थापन, ढल निकास सुधार, सामुदायिक विद्यालयको गुणस्तर अभिवृद्धि, स्वास्थ्य सेवाको पहुँच विस्तार, कृषि क्षेत्रको आधुनिकीकरण तथा रोजगार सिर्जना जस्ता क्षेत्रलाई आफ्नो मुख्य प्राथमिकतामा राख्ने योजना रहेको बताएकी छिन्। उनले विशेष गरी महिला सशक्तीकरण, युवालाई स्वरोजगार र सीप विकासका अवसर उपलब्ध गराउने, साना तथा घरेलु उद्योग प्रवद्र्धन गर्ने र आर्थिक सुदृढीकरणमा जोड दिने प्रतिबद्धता व्यक्त गरिन्।
कुर्मीले आफ्नो भाषणमा भनिन्, “विकास माथिबाट थोपरिने होइन, जनतासँगको सहकार्य र सहभागिताबाट सम्भव हुन्छ। म पारदर्शी, जवाफदेही र सहभागी शासन प्रणालीलाई अघि बढाउनेछु। भ्रष्टाचार नियन्त्रण र सेवा प्रवाहमा सुधार ल्याउने हाम्रो उद्देश्य हो।” उनले मतदातासँग गरेको संवादमा आफ्नो योजना र कार्यशैलीलाई स्पष्ट पारेकी छिन् र कार्यान्वयन योग्य तथा परिणाममुखी विकासका वाचा गरेकी छिन्।
कार्यक्रममा सहभागी स्थानीय मतदाताले सडक मर्मत, बाढी नियन्त्रण, शिक्षा गुणस्तर सुधार, स्वास्थ्य सेवा सुदृढीकरण र ग्रामीण पूर्वाधार विकास जस्ता विषयमा तत्काल पहल आवश्यक रहेको बताएका थिए। मतदाताहरूले महिला नेतृत्वमा विश्वास व्यक्त गर्दै विकासमुखी सोच भएका प्रतिनिधिलाई अवसर दिनुपर्ने र कुर्मीलाई सक्रिय रूपमा समर्थन गर्ने प्रतिबद्धता पनि जनाएका थिए।
राजनीतिक विश्लेषकहरूले पर्सा–२ मा प्रतिस्पर्धा उच्च हुने र यस क्षेत्रमा मतदातासँगको प्रत्यक्ष संवादले उम्मेदवारको सफलतामा निर्णायक भूमिका खेल्ने बताएका छन्। कुर्मीले आगामी निर्वाचनमा विजयी भएपश्चात पनि मतदातासँग निरन्तर संवाद गर्ने, प्रत्येक वडा तथा टोलमा नियमित अन्तरक्रिया कार्यक्रम सञ्चालन गर्ने र गुनासो व्यवस्थापन संयन्त्र स्थापना गर्ने योजना रहेको उल्लेख गरेकी छिन्।
यसरी कुर्मीले आफ्नो अभियानमार्फत मतदातासँगको विश्वास जित्न र क्षेत्रको समग्र विकासलाई अगाडि बढाउन सक्रिय भूमिका खेलेकी छिन्। चुनावी अभियानको यस किसिमको रणनीति र जनसंपर्कले उनलाई निर्वाचनको दिनमा महत्वपूर्ण फाइदा दिलाउने अपेक्षा गरिएको छ।
