सिरहा । सिरहाको गोलबजार नगरपालिका क्षेत्रमा टिपरको हाइड्रोलिक उठाउने क्रममा माथिबाट गुज्रिएको विद्युत् प्रसारण लाइनमा छोएपछि करेन्ट लागेर एक जनाको मृत्यु भएको छ।
जिल्ला प्रहरी कार्यालय सिरहाका सूचना अधिकारी तथा प्रहरी नायब उपरीक्षक रमेशबहादुर पालका अनुसार गोलबजार नगरपालिका–२ स्थित गुरुधाम जाने सडकखण्डमा आज बिहान प्रदेश २–०–००१ क ००४५ नम्बरको टिपरको पछिल्लो भाग सफा गर्ने क्रममा हाइड्रोलिक प्रणाली प्रयोग गरी डाला उठाइएको थियो।
सोही क्रममा टिपरको उठाइएको भाग माथि रहेको विद्युत् प्रसारण लाइनमा छोएपछि करेन्ट सर्ट भई सवारी साधनमा आगलागीसमेत भएको प्रहरीले जनाएको छ। करेन्ट लागेर गम्भीर घाइते भएका गोलबजार नगरपालिका–३ का करिब ४३ वर्षीय सन्तोष साहको उपचारका क्रममा मृत्यु भएको हो।
साह हाल गोलबजार नगरपालिका–२ मा बस्दै आएका थिए। प्रहरीका अनुसार उनी उक्त टिपरका सवारीधनीसमेत रहेका थिए। करेन्ट लागेपछि स्थानीयवासी र प्रहरीको टोलीले तत्काल उद्धार गरी उनलाई उपचारका लागि नजिकैको अस्पताल पुर्याएको थियो। तर चिकित्सकले उपचारकै क्रममा मृत घोषणा गरेका हुन्।
घटनापछि आगलागी भएको टिपरलाई प्रहरीले नियन्त्रणमा लिएको छ। प्रहरी टोलीले तत्कालै आगो नियन्त्रणमा लिएको जनाएको छ भने घटनाबारे थप अनुसन्धान सुरु गरिएको जानकारी दिएको छ।
मृतकको शव परीक्षणका लागि लहानस्थित रामकुमार उमाप्रसाद प्रादेशिक अस्पताल पठाइएको प्रहरीले जनाएको छ।
प्रहरीले उच्च भोल्टेज विद्युत् लाइन नजिक सवारी साधन सञ्चालन तथा मर्मतसम्भारका क्रममा विशेष सावधानी अपनाउन सबैलाई आग्रह गरेको छ।
