पर्सा – पर्सा क्षेत्र नं. २ बाट जनता समाजबादी पार्टी नेपाल का तर्फबाट प्रतिनिधि सभा सदस्य पदका उम्मेदवार अशोक कुमार टेमानीले चुनावी घरदैलो अभियानलाई पहिलो प्राथमिकतामा राख्दै अभियान तीव्र बनाएका छन्।
उम्मेदवार टेमानीले जनताको दुःख–सुख र समस्यालाई आफ्नो मुख्य एजेन्डा बनाउँदै घरदैलोमार्फत प्रत्यक्ष भेटघाट र संवादलाई प्राथमिकता दिएको बताएका छन्। “जनताको समस्या नै मेरो समस्या हो,” भन्दै उनले मतदातासँग प्रत्यक्ष सम्बन्ध स्थापित गर्दै अघि बढिरहेको उल्लेख गरे।
घरदैलो अभियानका क्रममा उनले युवापुस्तासँग माया आदान–प्रदान गर्नुका साथै वृद्धवृद्धा तथा ज्येष्ठ नागरिकसँग आशीर्वाद लिएका छन्। फागुन २१ गते हुने प्रतिनिधि सभा निर्वाचनलाई ऐतिहासिक अवसरका रूपमा उल्लेख गर्दै उनले मधेश र मधेशीको अधिकार र पहिचानका लागि आफ्नो उम्मेदवारी रहेको बताए।
अभियानमा पार्टीका केन्द्रीय सदस्य करिमा बेगम, रेखा साह, पूर्व वडाध्यक्ष सन्तोष तिवारी, युवा नेता प्रमोद यादव, केदार गुप्ता, शिक्षक प्रभु यादव, मनोज यादव लगायत नेता तथा कार्यकर्ताहरूको उल्लेखनीय सहभागिता रहेको थियो।
