काठमाडौँ — आगामी फागुन २१ गते हुने प्रतिनिधिसभा निर्वाचन बहिष्कार गरेको आरोपमा प्रहरीले देशभरबाट ४२ जनालाई पक्राउ गरेको जनाएको छ। तीमध्ये हाल १४ जना मात्र हिरासतमा रहेको नेपाल प्रहरीले जानकारी दिएको छ।
नेपाल प्रहरीका केन्द्रीय प्रवक्ता तथा डीआईजी अविनारायण काफ्ले का अनुसार पक्राउ परेकामध्ये केहीलाई सम्झाई–बुझाई छाडिएको छ भने केहीलाई अदालतको आदेशपछि रिहा गरिएको छ।
बुधबार मात्रै अदालतको आदेशपछि दुर्गा प्रसाईं रिहा भएका छन्। मंगलबार ऋषि कटेल पनि अदालतको आदेशपछि छुटेका थिए।
हाल हिरासतमा रहेका व्यक्तिहरूमध्ये धर्मेन्द्र बाँस्तोला, विष्णु तिमल्सिना, मनबहादुर गुरुङ, गगन परियार, लक्ष्मण पाण्डे, भीमसेन परियार, शोभे थारु (खोमे थारु), रामचन्द्र कोहार, खेम गुरुङ, जिनसरी गुरुङ, हरि बहादुर श्रीस, प्रेमकुमार थाम्सुहाङ्ग, देवी संग्रौला र गोपाल बोहरा रहेका छन्।
सुरक्षा स्रोतका अनुसार हाल १२ वटा समूह निर्वाचन बहिष्कार अभियानमा सक्रिय छन् र ती समूहबाट निर्वाचनमा सुरक्षा चुनौती हुनसक्ने विश्लेषण गरिएको छ। कम्युनिस्ट विचारधारादेखि राजावादी समूहसम्मलाई निगरानीमा राखिएको प्रहरीले जनाएको छ।
सीपी गजुरेल नेतृत्वको क्रान्तिकारी कम्युनिस्ट पार्टी, विश्वभक्त दुलाल नेतृत्वको वैज्ञानिक समाजवादी कम्युनिस्ट पार्टी, महेन्द्र मल्ल नेतृत्वको नेकपा जनपक्ष, ऋषिराम कट्टेल नेतृत्वको नेपाल कम्युनिस्ट पार्टी लगायतका समूहलाई पनि सुरक्षा संयन्त्रले सम्भावित चुनौतीका रूपमा लिएको छ।
यसैगरी, राजावादी समूहहरू तथा अन्य पहिचानवादी संगठनहरूलाई समेत निगरानीमा राखिएको जनाइएको छ। सुरक्षा निकायले निर्वाचन शान्तिपूर्ण र भयरहित वातावरणमा सम्पन्न गराउन सुरक्षा व्यवस्था कडा बनाइएको जनाएको छ।
