काठमाडौं। भारतको केन्द्रीय क्याबिनेटलेकेरला राज्यको नाम परिवर्तन गरी ‘केरलम’ राख्ने प्रस्ताव स्वीकृत गरेको छ। मंगलबार, २४ फेब्रुअरीमा बसेको मन्त्रिपरिषद् बैठकले नाम परिवर्तनसम्बन्धी प्रस्तावलाई अनुमोदन गरेको हो।
केन्द्रीय मन्त्री Ashwini Vaishnawले प्रेस ब्रिफिङमार्फत उक्त निर्णयको जानकारी दिएका हुन्। उनका अनुसार राज्यको नाम संविधानको पहिलो अनुसूचीमा संशोधन गरेर परिवर्तन गरिनेछ।
यसअघि केरला विधानसभाले जुन २०२४ मा राज्यको नाम परिवर्तनका लागि प्रस्ताव पारित गर्दै भारत सरकारसँग आवश्यक संवैधानिक संशोधन गर्न आग्रह गरेको थियो।
सरकारी प्रेस विज्ञप्तिअनुसार अब ‘केरला (नाम परिवर्तन) विधेयक, २०२६’ केरला विधानसभामा पठाइनेछ, जहाँ यसबारे थप छलफल हुनेछ। विधानसभाको राय प्राप्त भएपछि भारत सरकारले आवश्यक प्रक्रिया अघि बढाउँदै संसदमा विधेयक पेश गर्न राष्ट्रपतिको सिफारिस लिनेछ।
उल्लेखनीय छ कि केरला राज्यमा आगामी मार्च–अप्रिलमा विधानसभा निर्वाचन हुने अपेक्षा गरिएको छ। निर्वाचनअघि नै नाम परिवर्तन प्रस्तावले स्वीकृति पाएको छ।
