काठमाडौं – फाल्गुन शुक्ल अष्टमीका अवसरमा आज बिहान वसन्तपुरस्थित हनुमानढोका दरबारअगाडि फागुको चिर ठड्याइएपछि विधिवत् रूपमा फागु पर्व सुरु भएको छ।
नेपाल पञ्चाङ्ग निर्णायक विकास समितिको साइतअनुसार मंगलबार बिहान ७ः१३ बजे चिरोत्थान गरिएको हो। निवृत्तभरण व्यवस्थापन कार्यालय, त्रिपुरेश्वरले मागेअनुसार पूर्वफर्केर चिर ठड्याउने साइत दिएको समितिका कार्यकारी निर्देशक लक्ष्मण पन्थीले जानकारी दिनुभयो।
परम्पराअनुसार फाल्गुन शुक्ल अष्टमीका दिन वसन्तपुरमा चिर ठड्याएपछि उपत्यकामा फागु पर्व सुरु हुन्छ र शुक्ल पूर्णिमासम्म हर्षोल्लासका साथ मनाइन्छ। चिर ठड्याएसँगै वसन्तपुरमा रंगीबिरंगी रङ खेल्दै मानिसले खुसी मनाएका थिए।
नेपाल पञ्चाङ्ग समितिका अनुसार फाल्गुन शुक्ल पूर्णिमाका दिन अर्थात् फागुन १८ गते सोमबार राति ५ः३१ बजे चिर ढाल्ने साइत रहेको छ। त्यसै दिन राति ५ः५१ बजे चिर घिसारेर टुँडिखेलमा जलाएपछि पर्व समाप्त हुने जनाइएको छ।
यस वर्ष पहाडी जिल्लामा फागु पर्व फागुन १८ गते सोमबार र तराइका जिल्लामा फागुन १९ गते मंगलबार मनाइँदैछ।
