काठमाडौं — गृह मन्त्रालय ले धादिङमा भएको बस दुर्घटनाबारे छानबिन गर्न सहसचिवको नेतृत्वमा ५ सदस्यीय कार्यदल गठन गर्ने निर्णय गरेको छ। मन्त्रालयका प्रवक्ता (सहसचिव) आनन्द काफ्ले ले घटनाको विस्तृत अध्ययन तथा छानबिनका लागि कार्यदल गठन प्रक्रिया अघि बढाइएको जानकारी दिए। उनका अनुसार कार्यदलका संयोजक र सदस्यहरूको नाम भने टुंगो लाग्न बाँकी छ।
सोमबार बिहान पोखरा बाट काठमाडौं आउँदै गरेको ग.२ ख १४२१ नम्बरको यात्रुबाहक बस बेनीघाट रोराङ गाउँपालिका–५ भैंसीगौडा मा दुर्घटनाग्रस्त भएको थियो। दुर्घटनामा परी १९ जनाको मृत्यु भएको राजमार्ग सुरक्षा तथा ट्राफिक व्यवस्थापन कार्यालय, रामनगर का एसपी डिल्लीनारायण पाण्डे ले जानकारी दिए।
दुर्घटनामा २५ जना घाइते भएका छन्। घाइतेहरूको विभिन्न अस्पतालमा उपचार भइरहेको जनाइएको छ।
छानबिन कार्यदल गठन गर्नुअघि गृहमन्त्री ओमप्रकाश अर्याल ले सरोकारवालाहरूसँग छलफल गरेका थिए। बैठकमा भौतिक पूर्वाधार तथा यातायात मन्त्रालय का सचिव, यातायात व्यवस्था विभाग का महानिर्देशक, नेपाल प्रहरी र सशस्त्र प्रहरी बल का प्रमुख तथा गृह मन्त्रालयका सचिव सहभागी रहेका थिए।
सरकारले दुर्घटनाको कारण पत्ता लगाई भविष्यमा यस्ता घटना दोहोरिन नदिन आवश्यक कदम चाल्ने जनाएको छ।
