पर्सा — फागुन २१ गते हुने प्रतिनिधिसभा सदस्य निर्वाचन नजिकिँदै जाँदा देशभर चुनावी माहोल तातिरहेको छ। निर्वाचन नजिकिएसँगै उम्मेदवारहरू मतदाता भेटघाट, घरदैलो तथा चुनावी सभामा सक्रिय बनेका छन्। प्रचार–प्रसार, रणनीतिक समीकरण र शक्ति सन्तुलनको आन्तरिक गणनामा दलहरू व्यस्त देखिन्छन्।
यसैक्रममा राष्ट्रिय प्रजातन्त्र पार्टीकी बीना जैसवाल कुर्मीले पर्सा क्षेत्र नम्बर–२ अन्तर्गत बहुदरमाई नगरपालिका–४ डोकैला बहुवरीमा घरदैलो कार्यक्रम सम्पन्न गरेकी छन्। कार्यक्रममा स्थानीय बासिन्दासँग प्रत्यक्ष संवाद गर्दै उनले आफ्नो चुनावी एजेन्डा प्रस्तुत गरिन्।
उम्मेदवार कुर्मीले क्षेत्रको विकास, महिला सशक्तीकरण, स्वरोजगार प्रवर्द्धन तथा आधारभूत पूर्वाधार विस्तारलाई आफ्नो प्राथमिकतामा राखेर काम गर्ने प्रतिबद्धता व्यक्त गरिन्। उनले स्थानीय समस्याबारे जानकारी लिँदै सडक, शिक्षा, स्वास्थ्य र कृषि क्षेत्रमा सुधारका लागि पहल गर्ने आश्वासन दिइन्।
घरदैलो कार्यक्रममा सहभागी मतदाताहरूले आफ्ना अपेक्षा र सुझाव राख्दै क्षेत्रका लागि विकासमुखी नेतृत्वको आवश्यकता औँल्याए। मतदाताहरूले महिला नेतृत्व र पारदर्शी प्रशासनमा विश्वास व्यक्त गर्दै कुर्मीलाई पूर्ण समर्थन गर्ने प्रतिबद्धता व्यक्त गरे।
उम्मेदवार कुर्मीले जनताको विश्वास र समर्थनको आधारमा निर्वाचनमा विजयी हुने दाबीसमेत गरिन्। उनले मतदातासँग निरन्तर संवाद कायम राख्ने र क्षेत्रीय समस्यामा प्रत्यक्ष संलग्न रहने कुरा सुनिश्चित गरिन्।
पर्सा–२ मा निर्वाचन नजिकिँदै जाँदा राजनीतिक गतिविधि थप सक्रिय बन्दै गएको छ। विभिन्न दलका उम्मेदवारहरू मतदाताको घरदैलोमा पुगेर समर्थन जुटाउने अभियानमा व्यस्त देखिएका छन्। मतदाता भेटघाट र घरदैलो कार्यक्रमले चुनावी प्रतिस्पर्धालाई रोचक र प्रत्यक्ष बनाएको छ भने स्थानीय समुदायलाई आफ्ना आवश्यकताहरू सिधै उम्मेदवारसम्म पुर्याउने अवसर दिएको छ।
यस घरदैलो अभियानले बीना जैसवाल कुर्मीको जनतासँगको सम्बन्ध बलियो बनाएको छ र पर्सा–२ को निर्वाचनमा उनको प्रभावकारिता बढाउने संकेत दिएको स्थानीय राजनीतिक विश्लेषकहरूले बताएका छन्।
