काठमाडौं । आसन्न प्रतिनिधिसभा सदस्य निर्वाचनलाई लक्षित गर्दै सशस्त्र प्रहरी बल नेपालको प्रधान कार्यालयले २३ जना सशस्त्र प्रहरी बरिष्ठ उपरीक्षक (एसएसपी) लाई सोमबारदेखि देशभर खटाउने भएको छ।
उपत्यकाबाट खटिन लागेका अधिकृतहरूलाई प्रधान कार्यालयबाट तथा प्रदेशस्थित बाहिनी मुख्यालयबाट खटिन लागेका एसएसपीहरूलाई भर्चुअल माध्यममार्फत राजु अर्यालले विशेष निर्देशन दिएका छन्।
सशस्त्र प्रहरीका सहायक प्रवक्ता शैलेन्द्र थापाका अनुसार आईजी अर्यालले निर्वाचनअघि, निर्वाचनको समयमा र निर्वाचनपछिको अवधिमा आउन सक्ने जुनसुकै चुनौतीपूर्ण अवस्थाको सामना गर्दै शान्तिपूर्ण रूपमा निर्वाचन सम्पन्न गराउन निर्देशन दिएका छन्।
अर्यालले निर्वाचन अवधिभर उम्मेदवार, मतदान केन्द्र, मतदाता तथा मतपेटिकाको सुरक्षामा विशेष सतर्कता अपनाउन निर्देशन दिएका छन्। उनले सुरक्षासँग सम्बन्धित सूचनाको प्रभावकारी संकलन, सबै तहका कमाण्डरसँग समन्वय तथा उम्मेदवारहरूसँग निरन्तर सम्पर्कमा रहन पनि आग्रह गरेका छन्। फिल्डमा देखिएका कमीकमजोरी र तत्काल गर्नुपर्ने कामबारे शीघ्र मुख्यालयलाई जानकारी गराउन समेत उनले निर्देशन दिएका छन्।
त्यसैगरी, सीमा क्षेत्रको विशेष अनुगमन गर्न, आवश्यक परेमा मानवअधिकारको पूर्ण पालना गर्दै मात्र बल प्रयोग गर्न र बल प्रयोगका क्रममा आवश्यक प्रमाण सुरक्षित राख्न आईजी अर्यालले स्पष्ट निर्देशन दिएका छन्। निर्वाचन बिथोल्न खोज्ने तत्वहरूको पहिचान गरी सोहीअनुसार रणनीति तयार गर्न र कानूनअनुसार कारबाही गर्न मातहतका सबै तहका कमाण्डरहरूलाई उनले सचेत गराएका छन्।
निर्वाचनलाई सुरक्षित, निष्पक्ष र भयरहित वातावरणमा सम्पन्न गराउने उद्देश्यले सशस्त्र प्रहरीले सुरक्षा तयारीलाई तीव्र बनाएको जनाएको छ।
