कोपनहेगन – डेनमार्कका रक्षामन्त्री ट्रोअल्स लुन्ड पौल्सेनले ग्रिनल्यान्डलाई अन्य देशहरूबाट चिकित्सा सहायता आवश्यक नभएको स्पष्ट पारेका छन्।
डोनाल्ड ट्रम्पले ग्रिनल्यान्डतर्फ अस्पताल जहाज पठाइरहेको दाबी गरेपछि मन्त्री पौल्सेनले सार्वजनिक रूपमा यस्तो प्रतिक्रिया दिएका हुन्।
मन्त्री पौल्सेनले ग्रिनल्यान्डका नागरिकहरूले आवश्यक स्वास्थ्य सेवा प्राप्त गरिरहेको उल्लेख गर्दै भने, “ग्रिनल्यान्डको जनसङ्ख्याले आवश्यक स्वास्थ्य सेवा प्राप्त गर्छ। उनीहरूले सेवा या त ग्रिनल्यान्डमै पाउँछन् वा विशेष उपचार आवश्यक परेमा डेनमार्कमा प्राप्त गर्छन्। त्यसैले कुनै विशेष बाह्य स्वास्थ्य सेवा पहलको आवश्यकता छैन।”
डेनमार्कमा जस्तै ग्रिनल्यान्डमा पनि स्वास्थ्य सेवामा पहुँच निःशुल्क रहेको बताइएको छ। आर्कटिक क्षेत्रमा अवस्थित विशाल टापुमा पाँच वटा क्षेत्रीय अस्पताल सञ्चालनमा छन्, जसमा नुक अस्पतालले सम्पूर्ण क्षेत्रका बिरामीहरूलाई सेवा दिइरहेको छ।
ग्रिनल्यान्डको स्थानीय सरकारले आफ्ना बिरामीहरूको उपचार सुविधा अझ सुधार गर्न फेब्रुअरीको सुरुमा कोपनहेगनसँग सम्झौता गरेको थियो।
शनिबार ट्रम्पले आफ्नो सामाजिक सञ्जाल प्लेटफर्म Truth Socialमार्फत पोस्ट गर्दै ग्रिनल्यान्डमा बिरामी भएका र हेरचाह नपाएका व्यक्तिहरूको उपचारका लागि ठूलो अस्पताल जहाज पठाइरहेको दाबी गरेका थिए।
यसअघि ट्रम्पले ग्रिनल्यान्डलाई अमेरिकाले आफ्नो सुरक्षा सुनिश्चित गर्न नियन्त्रण गर्नुपर्ने अभिव्यक्ति दिएका थिए। तर पछि NATOका महासचिव मार्क रुटेसँग अमेरिकी प्रभाव सुनिश्चित गर्ने ‘फ्रेमवर्क’ सम्झौतापछि उनले कब्जा गर्ने सम्बन्धी पूर्व अभिव्यक्ति फिर्ता लिएको जनाइएको छ।
मन्त्री पौल्सेनले आफूलाई अस्पताल जहाजको सम्भावित आगमनबारे कुनै औपचारिक जानकारी नभएको बताए। उनले ट्रम्पका अभिव्यक्तिलाई अन्तर्राष्ट्रिय राजनीतिमा विकसित भइरहेको नयाँ प्रवृत्तिको संकेतका रूपमा टिप्पणी गरे।
यसैबीच, शनिबार डेनमार्कको आर्कटिक कमान्डले तत्काल चिकित्सा सहायता आवश्यक परेपछि अमेरिकी पनडुब्बीका एक चालक दल सदस्यलाई नुकको तटबाट उद्धार गरिएको जानकारी दिएको छ।
