काठमाडौं – निर्वाचन आयोगले आसन्न प्रतिनिधिसभा सदस्य निर्वाचनका लागि फागुन २०, २१ र २२ गते गरी तीन दिन सार्वजनिक बिदा दिन सरकारलाई सिफारिस गरेको छ।
निर्वाचनमा उत्साहजनक सहभागिता सुनिश्चित गर्न मतदानको अघिल्लो दिन, मतदानको दिन र भोलिपल्टसमेत सार्वजनिक बिदा दिन नेपाल सरकारलाई सिफारिस गरिएको आयोगका प्रवक्ता एवं सहसचिव नारायणप्रसाद भट्टराईले जानकारी दिए।
आयोगका अनुसार विभिन्न पेसा, व्यवसाय तथा रोजगारीका कारण मतदाता नामावली भएको स्थानभन्दा टाढा रहेका नागरिकलाई मतदान केन्द्रसम्म पुग्न सहज होस् भन्ने उद्देश्यले तीन दिन बिदा सिफारिस गरिएको हो। यसले मतदानमा सहभागिता दर बढ्ने विश्वास आयोगले व्यक्त गरेको छ।
यसअघि फागुन १८ गते सोमबार पहाडी जिल्लामा तथा फागुन १९ गते मङ्गलबार तराईका जिल्लामा फागु पूर्णिमा (होली) पर्वको सार्वजनिक बिदा परेको छ। त्यससँगै निर्वाचन केन्द्रित बिदा थपिएमा लगातार केही दिन सार्वजनिक बिदा हुने अवस्था रहनेछ।
आयोगले शान्तिपूर्ण, निष्पक्ष र भयरहित वातावरणमा निर्वाचन सम्पन्न गर्न आवश्यक तयारी तीव्र पारेको जनाएको छ।
