रौतहट – गौर नगरपालिका क्षेत्रमा दुई समुदायबीच बढ्दो तनावका कारण कर्फ्यू आदेश जारी गरिएको छ। प्रमुख जिल्ला अधिकारी दिनेशसागर भुसालले शनिबार (फागुन ९) दिउँसो १ बजेबाट अर्को आदेश नआएसम्म कर्फ्यू लागु हुने जानकारी दिनुभएको छ।
सीडीओ भुसालका अनुसार, उच्छृंखल गतिविधिमा संलग्न १८ जनालाई प्रहरीले पक्राउ गरेको छ। जारी कर्फ्यूमा कुनै व्यक्ति आवतजावत गर्न, भेला गर्न, सभा, जुलुस वा प्रदर्शन गर्न पाउने छैन। आदेश उल्लंघन गर्नेलाई स्थानीय प्रशासन ऐन, २०२८ को दफा ६क अनुसार कारबाही गरिने चेतावनी दिइएको छ।
दुई समुदायबीचको झडपका कारण गौर सदरमुकाम तनावग्रस्त बनेको थियो। यसक्रममा केही व्यक्ति घाइते भएका छन् भने केही सवारीसाधनमा आगजनी भएको छ। सुरक्षा निकायले घटनास्थलमा सतर्कता बढाएको छ र शान्ति कायम गर्न कार्यरत छ।
