दाङ — तुलसीपुरमा नेपाल कम्युनिस्ट पार्टी (एमाले) को झण्डा जलाएको आरोपमा प्रहरीले एक जनालाई पक्राउ गरेको छ।
जिल्ला प्रहरी कार्यालय दाङका अनुसार तुलसीपुर–७ कालाखोलाका ५५ वर्षीय वुद्धिबहादुर बस्नेतलाई शुक्रबार पक्राउ गरिएको हो। प्रहरी नायब उपरीक्षक रेशम बोहराले झण्डा जलाउने घटनामा संलग्न तीन जनाको पहिचान भएको जानकारी दिँदै दुई जना अझै फरार रहेको र उनीहरूको खोजी कार्य जारी रहेको बताए।
प्रहरीका अनुसार घोराहीमा आयोजित कार्यक्रममा सहभागी हुन राष्ट्रिय स्वतन्त्र पार्टी (रास्वपा) का सभापति रवि लामिछाने र नेता बालेन शाह आउने भन्ने खबर पाएपछि तुलसीपुरको वीरेन्द्र चोकमा भेला भएका केही समर्थकहरूले एमालेको झण्डा जलाएको आरोप लागेको हो।
घटनापछि एमालेले दोषीमाथि कडा कारबाहीको माग गरेको छ। यसैबीच एमालेले शुक्रबार अपराह्न करिब ४ बजे घोराहीमा प्रदर्शनसमेत गरेको जनाएको छ।
प्रहरीले घटनाबारे थप अनुसन्धान भइरहेको बताएको छ।
