माघ १६ – बारा जिल्लाको परवानीपुर गाउँपालिका वडा नम्बर–५ बहुअरीमा जनता समाजवादी पार्टी नेपालले अगुवा कार्यकर्ता भेला आयोजना गरेको छ। आगामी निर्वाचनलाई लक्षित गर्दै आयोजित भेलामा पार्टी संगठन सुदृढीकरण तथा उम्मेदवारको जित सुनिश्चित गर्ने विषयमा केन्द्रित रहेर छलफल गरिएको छ।
अगुवा कार्यकर्ता भेलामा मधेस प्रदेशका पूर्व मुख्यमन्त्री जितेन्द्र सोनल प्रमुख अतिथिका रूपमा सहभागी रहनुभएको थियो। कार्यक्रममा सम्बोधन गर्दै पूर्व मुख्यमन्त्री सोनलले मधेसको हक–अधिकार, सामाजिक न्याय र समावेशी विकासका मुद्दामा जनता समाजवादी पार्टीको भूमिका निर्णायक रहेको बताउनुभयो।
भेलामा वरिष्ठ अधिवक्ता रामचन्द्र सिंह तथा क्षेत्रीय अध्यक्ष सिताराम लगाउतले बारा निर्वाचन क्षेत्र नम्बर–४ बाट छाता छापका उम्मेदवार सन्जु साहलाई विजयी बनाउन पार्टीका अगुवा कार्यकर्ताहरू एकजुट र सक्रिय भएर लाग्न आह्वान गर्नुभयो। उनीहरूले घरदैलो अभियान, जनसम्पर्क र संगठन विस्तारमार्फत जनतासँग प्रत्यक्ष संवाद बढाउनुपर्नेमा जोड दिएका थिए।
कार्यक्रममा मोहन पटेल, वडा अध्यक्ष रामेश्वर साहलगायत पार्टीका स्थानीय नेता–कार्यकर्ता तथा अगुवाहरूको उल्लेखनीय उपस्थिति रहेको थियो। भेलाले आगामी दिनमा चुनावी अभियानलाई अझ प्रभावकारी बनाउने निर्णय गरेको जनाइएको छ।
