माघ १४ – मधेसको भाषा, साहित्य र संस्कृतिको प्रवर्द्धन गर्ने उद्देश्यसहित वीरगन्जमा भोलि (बिहीबार) देखि आयोजना हुने दोस्रो मधेश साहित्य महोत्सवको सम्पूर्ण तयारी पूरा भएको आयोजकले जनाएको छ।
आयोजक संस्था उत्कर्ष नेपालका अध्यक्ष रितुराज साहका अनुसार महोत्सवमा मधेशसहित देशभरका साहित्यकार, लेखक, कवि तथा चिन्तकहरूको सहभागिता रहनेछ। महोत्सवका क्रममा कविता वाचन, साहित्यिक विमर्श, पुस्तक विमोचन तथा विविध सांस्कृतिक कार्यक्रमहरू प्रस्तुत गरिनेछ।
मधेस विश्वविद्यालय परिसरमा आयोजना हुने महोत्सवले मधेशको साहित्यिक पहिचानलाई राष्ट्रिय तथा अन्तर्राष्ट्रिय स्तरमा चिनाउने लक्ष्य लिएको साहले बताए। युवापुस्तालाई साहित्यतर्फ आकर्षित गर्न विशेष सत्रहरू समेत समावेश गरिएको उनको भनाइ छ।
उद्घाटन समारोहका प्रमुख अतिथि मधेश प्रदेशका मुख्यमन्त्री कृष्णप्रसाद यादव रहनेछन्। महोत्सवको बीजपत्र ‘गाँवः स्मृति, मिथक र यथार्थ’ विषयमा प्रस्तुत गरिनेछ, जसका वक्ता भाष्कर गौतम रहेका छन्।
त्यसैगरी ‘गाँवका युवाः पलायन, पोलिसी र विकल्प’ सत्रमा वसन्तकुमार कुशवाहा, भोगेन्द्र झा र सलोनी प्रधान सिंह वक्ताका रूपमा सहभागी हुनेछन्। ‘गाँवः लोकतन्त्र र सत्ता’ विषयक सत्रमा सुरेश ढकाल, सुचेता प्याकुरेल र सविन निङ्ग्लेखु वक्ता रहनेछन् भने ‘गाँवः स्मृति र इतिहास’ सत्रमा गोपाल ठाकुर, अन्जय मिश्रा, त्रिभुवन बरई र राकेश मिश्रले धारणा राख्नेछन्।
तीन दिनसम्म सञ्चालन हुने महोत्सवले मधेशको साहित्य, संस्कृति र बौद्धिक विमर्शलाई नयाँ उचाइ दिने अपेक्षा गरिएको आयोजकले जनाएको छ।
