माघ १४ – बारा जिल्लाको परवानीपुर गाउँपालिका–१ रहरियाडमा बुधबार बिहान एकै परिवारका दुई जनाको हत्या भएको घटनामा संलग्न रहेको आरोपमा प्रहरीले दुई जनालाई पक्राउ गरेको छ।
प्रहरीका अनुसार २८ वर्षीय रामेश्वर मण्डल र उनकी आमा ४६ वर्षीया सुमिन्त्रा देवीको धारिलो हतियार प्रयोग गरी घाँटी रेटेर हत्या गरिएको हो। उक्त घटनामा मृतक रामेश्वरका बुवा ५२ वर्षीय जगरुप महतो र बहिनी २२ वर्षीया रिना कुमारी मण्डल गम्भीर घाइते भएका छन्। घाइते दुवैको परवानीपुरस्थित एलएस न्युरो अस्पतालमा उपचार भइरहेको छ।
घटनामा संलग्न रहेको आरोपमा प्रहरीले मृतक रामेश्वरकी पत्नी २३ वर्षीया मनिता देवी मण्डल र उनका प्रेमी बाराको प्रसौनी गाउँपालिका–७ बन्जरियाका धमेन्द्र महतोलाई पक्राउ गरेको हो।
प्रहरीको प्रारम्भिक अनुसन्धानअनुसार विवाहिता मनिता देवीको परपुरुषसँग प्रेम सम्बन्ध रहेकै कारण उक्त हत्या भएको अनुमान गरिएको छ। मनिताले आफ्ना प्रेमी धमेन्द्र महतोसँग मिलेर योजनाबद्ध रूपमा पति रामेश्वर मण्डल र सासु सुमिन्त्रा देवीको धारिलो हतियार प्रयोग गरी हत्या गरेको खुलेको प्रहरीले जनाएको छ।
प्रहरीका अनुसार धमेन्द्र महतो वैदेशिक रोजगारीको सिलसिलामा दुबईमा कार्यरत थिए। उनी माघ १२ गते काठमाडौँ आइपुगेपछि मनितासँग मिलेर उक्त घटना गराएको प्रारम्भिक अनुसन्धानबाट खुलेको हो। घटनाको मुख्य योजनाकार मनिता नै रहेको बारा प्रहरी उपरीक्षक नरेन्द्र कुँवरले जानकारी दिए।
पक्राउ परेका मनिता देवी मण्डल र धमेन्द्र महतोलाई प्रहरी हिरासतमा राखी घटनाबारे थप अनुसन्धान भइरहेको प्रहरी उपरीक्षक कुँवरले बताए।
