माघ १३ — आगामी फागुन २१ गते हुने प्रतिनिधि सभा सदस्य निर्वाचनका लागि भारत सरकारले नेपाल सरकारलाई ६१ वटा सवारी साधन सहयोग स्वरूप प्रदान गरेको छ। माघ ६ गते सिंहदरबारस्थित एक कार्यक्रममा भारतीय दूतावासले नेपाल सरकारलाई क्याबिन पिकअप भ्यान हस्तान्तरण गरेको हो।
हाल यी सवारी साधनहरू सिंहदरबारस्थित गृह मन्त्रालय अगाडि राखिएको छ। गृह मन्त्रालयले निर्वाचन प्रयोजनका लागि आवश्यक सवारी साधन उपलब्ध गराइदिन अर्थ मन्त्रालयमार्फत भारत सरकारसँग वस्तुगत सहयोग माग गरेको थियो। सोही प्रस्तावअनुसार पहिलो चरणमा भारत सरकारले ६१ वटा सवारी साधन उपहारस्वरूप उपलब्ध गराएको हो।
यसपटकको निर्वाचनका लागि भारत सरकारले साना–ठूला गरी जम्मा ५३८ वटा सवारी साधन उपलब्ध गराउने बताइएको छ। उक्त सवारी साधनहरू नेपाल सरकारको नाममा प्राप्त भएकाले निर्वाचन सम्पन्न भएपछि सरकारले आफ्नो आवश्यकताअनुसार प्रयोग गर्न सक्नेछ।
भारत सरकारले विगतदेखि नै नेपालमा हुने निर्वाचनलाई सफल बनाउन सवारी साधनसहित विभिन्न निर्वाचन सामग्री सहयोग गर्दै आएको छ।
