मधेश प्रदेशमा सरकार गठन प्रक्रियाप्रति एमालेभित्रै पनि असन्तुष्टि देखिएको छ । प्रदेश प्रमुख सुमित्रा सुवेदी भण्डारीले ठूलो दलको हैसियतमा एमाले संसदीय दलका नेता सरोजकुमार यादवलाई संविधानको धारा १६८ (३) बमोजिम मुख्यमन्त्रीमा नियुक्त गर्नुभएको थियो । बिहान उपचारका लागि काठमाण्डौ जान भन्दै जनकपुरबाट निस्कनुभएकी प्रदेश प्रमुख भण्डारीले बर्दिबासको एक होटलमा यादवलाई पद तथा गोपनीयताको शपथ ग्रहण गराउनुभएको थियो ।
संविधानको धारा १६८ को उपधारा २ अनुसार सरकार गठनको सम्भावना हुँदाहुँदै प्रदेश प्रमुखले उपधारा ३ बमोजिम यादवलाई मुख्यमन्त्री नियुक्त गरेर गलत गरेको एमाले प्रदेशसभाकै सांसदहरुले बताएका छन् । कांग्रेस लगायतका अरु दलहरुले पनि यसमा आपत्ती जनाएका छन् । यस्तै राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले मधेश प्रदेश सरकारको मन्त्रीमा नियुक्त कञ्चन बिच्छालाई तत्काल फिर्ता हुन निर्देशन दिनुभएको छ ।
नवनियुक्त मुख्यमन्त्री सरोजकुमार यादवले राप्रपा सांसद बिच्छालाई समेत मन्त्रिपरिषदमा सहभागी गराएपछि अध्यक्ष लिङ्देनले सरकारबाट फिर्ता हुन निर्देशन दिनुभएको हो । उहाँले निर्देशन पालना नगरे कारबाही हुने चेतावनी दिनुभएको छ । एमालेबाट लखन दास, समाजवादी पार्टीबाट विमला अन्सारी र राप्रपाबाट कञ्चन विच्छा मन्त्री बनेका थिए ।
यसअघि प्रदेश प्रमुख भण्डारी अस्वस्थ भएको भन्दै आज बिहानै जनकपुरबाट काठमाण्डौ जानुभएको र आफूले स्वास्थ्य लाभको कामना गरेको निवर्तमान मुख्यमन्त्री जितेन्द्र सोनलले बताउनुभएको थियो । तर लगत्तै प्रदेश प्रमुख भण्डारीले एमाले दलका नेता सरोजकुमार यादवलाई मुख्यमन्त्री नियुक्त गरेको पत्र सार्वजनिक भएको हो । निवर्तनमा मुख्यमन्त्री सोनलले विश्वासको मत नपाउने भएपछि अस्ति शनिबार पदबाट राजीनामा दिनुभएको थियो ।
