पर्सामा ८ वटा चोरीको मोटरसाईकल र चोरी गर्नमा प्रयोग गरेको मास्टर साचोसहित ४ जनालाई प्रहरीले पक्राउ गरेको छ । पक्राउ पर्नेमा वीरगंज महानगरपालिका वडा नम्बर २४ का २० बर्षीय आकाश तिवारी , वडा नम्बर २६ का २० बर्षीय रामप्रवेश पटेल , २६ बर्षीय अशोक पटेल र भारत बिहार पूर्वी चम्पारण रतनपुरका १९ वर्षीय शिवम पाण्डे रहेका छन ।
वीरगंज महानगरपालिका वडा नम्बर ८ मा पार्किंग गरी राखिएको पर्साको धोबिनी गाउँपालिका वडा नम्बर ४ लंगादीका रामबाबु कुमार गुप्ताको प्र २–०३–००७ प १७६६ नम्बरको मोटरसाइकलमा मास्टर साँचोको प्रयोग गरी रामप्रवेश पटेलले चोरी गरी लैजादै गरेको अवस्थामा वडा प्रहरी कार्यालय विर्ताबाट प्रहरी निरीक्षक बिशाल मल्लको कमाण्डमा खटिएको प्रहरीको टोलीले पक्राउ गरेको हो ।पक्राउ परेका रामप्रवेश पटेललाई प्रहरीको हिरासतमा राखेर अनुसन्धान गर्दा बिभिन्न मितिमा समेत चोरी भएका थप मोटरसाईकल सहित उनीहरुलाई समेत प्रहरीले पक्राउ गर्न सफल भएको जिल्ला प्रहरी कार्यालय पर्साले जनाएको छ ।प्रहरीले उनीहरूको साथबाट बिभिन्न मितिमा चोरी भएको ना ५२ प ५०२४, ना २७ प ७८४७, ना ११ प ११२१, ना ५३ प ७१०६, ना ३७ प ९८१८, ना ४६ प ८६२७ र प्र०३–००८ प ७१८६ नम्बरको मोटरसाइकलहरू नियन्त्रणमा लिएको छ । पक्राउ परेका चारै जनालाई प्रहरीको हिरासतमा राखेर थप अनुसन्धान भईरहेको प्रहरीले जानेको छ ।
यसैगरी वीरगंजको बिभिन्न स्थानमा वेवारिसे अवस्थामा रहेको ५ वटा मोटरसाईकल आफ्नो नियन्त्रणमा लिएर थप अनुसन्धानको लागी जिल्ला प्रहरी कार्यालय पर्साको जिम्मा लगाईएको वडा प्रहरी कार्यालय विर्ताका प्रहरी निरीक्षक बिशाल मल्लले जानकारी गराउनुभएको हो ।
