वीरगञ्ज महानगरका वडा कार्यालयको दैनिक सेवा १० दिन बन्द
वीरगञ्ज, ३ साउन । वीरगञ्जका वडा कार्यालयबाट प्रवाह हुने सेवा १० गतेसम्मका लागि बन्द गरिएको छ । साउन १ गतेदेखि १० गतेसम्म वडा कार्यालयबाट दैनिक रुपमा प्रदान हुँदै आएका सेवाहरु बन्द गरिएको हो ।
आ.व. २०७९/८० देखि कम्प्युटिकृत प्रणालीबाट मात्रै सबै किसिमका सेवाको दस्तुर असुल उपर गरिने भएकाले दैनिक सेवाहरु बन्द गरिएको वीरगञ्ज महानगरपालिकाका निमित्त प्रमुख प्रशासकिय अधिकृत अरविन्दलाल कर्णद्वारा जारी सूचनामा उल्लेख छ ।
वडा कार्यालयबाट दैनिक रुपमा हुने विभिन्न सिफारिस एवम् प्रमाणित वापत लाग्ने दस्तुर अब कम्प्युटर प्रणालीमार्फत जम्मा गरिने सूचनामा भनिएको छ ।
वडा नम्बर १ देखि ३२ सम्मका वडा कार्यालयमा कम्प्युटरमा सबै किसिमका कर, शूल्क र दस्तुरको दर राख्न १० दिनको समय लाग्ने भएकाले साउन १० गतेसम्म कर, शूल्क र दस्तुर बुझ्ने र सिफारिस तथा प्रमाणित कार्य बन्द रहने वीरगञ्ज महानगरपालिकाका मेयर राजेशमान सिंहले बताए ।
कम्प्युटरमा दर राखिसकेपछि यसले पारदर्शी हुने र तथ्यांकको विवरण पनि सुरक्षित हुने मेयर सिंहको बिश्वास छ ।
