पर्साको पकाहामैनपुर गाउँपालिकामा नेपाली कांग्रेसको सम्पूर्ण प्यानल विजयी
वीरगञ्ज, ४ जेठ । पर्साको पकाहामैनपुर गाउँपालिकामा नेपाली कांग्रेसको सम्पूर्ण प्यानल विजयी भएको छ ।
बुधबार साँझ सम्पन्न गाउँपालिकाको मतगणनाको अन्तिम परिणाम आउँदा अध्यक्ष, उपाध्यक्ष र पाँच वटै वडामा नेपाली कांग्रेसका उम्मेदवार विजयी भएका छन् ।
गाउँपालिकामा दुईजना खुला सदस्य र एकजना दलित महिला सदस्य बाहेकका सम्पूर्ण सिटमा नेपाली कांग्रेसका उम्मेदवार निर्वाचित भएको निर्वाचन अधिकृतको कार्यालय पकाहामैनपुर गाउँपालिकाले जनाएको छ । खुला र महिला सदस्यमा जसपाका उम्मेदवार विजयी भएका छन् ।
गाउँपालिकाको अध्यक्षमा सुरेश प्रसाद मेहता निर्वाचित भएका छन् । निकटतम प्रतिद्वन्द्वी जनता समाजवादी पार्टी नेपाल (जसपा) का उम्मेदवार एवम् निवर्तमान अध्यक्ष विजयकुमार चौरसियालाई २ हजार १ सय ५६ मतको फराकिलो अन्तरले पराजित गर्दै मेहता अध्यक्षमा निर्वाचित भएको निर्वाचन अधिकृत कृष्णाप्रसाद देवकोटाले जानकारी दिए ।
