देउवा–गगनसँग कुनै तिक्तता छैन : शेखर कोइराला
काठमाडौं । सत्तारुढ नेपाली कांग्रेस संस्थापनइतर नेता डा. शेखर कोइरालाले पार्टी सभापति शेरबहादुर देउवा र महामन्त्री गगन थापासँग कुनै तिक्तता नभएको बताएका छन् । आज (शुक्रबार) सुदूरपश्चिम प्रदेशका नेता–कार्यकर्ताहरूसँगको संवादमा क्रममा उनले यस्तो बताएका हुन् ।
‘उहाँ (शेरबहादुर देउवा) मेरो सभापति र नेता हो । मैले उहाँलाई दाइ जस्तै मान्छु,’ शेखरलाई उद्धृत गर्दै कञ्चनपुरका सभापति पदम बोगटीले भने । त्यहाँ शेखरले आफूले सभापति देउवालाई भेटेरै आएको बताएका थिए । १५औं महाधिवेशनलाई लिएर देउवा र शेखरबीच दूरी बढेको बताइन्छ । यसअघि कोशी प्रदेशको सम्मेलनमा पनि शेखर सहभागी भएनन् । त्यहाँ देउवाले शेखरबारे आफूलाई जानकारी नभएको बताएका थिए ।
पार्टीको संस्थापनइतर पक्षको नेतृत्व गरिरहेका शेखर गगन थापाले साथ छाडेपछि आफ्नै तवरले तयारीमा जुटेका छन् । गगन भने संस्थापन बन्ने दाउमा छन् । उनले महाअधिवेशन आउन एक वर्ष मात्र बाँकी रहेकाले आफू तयारीमा लागेको समेत जानकारी दिए । कोइरालाले महाधिवेशनसम्म एकताबद्ध भएर अघि बढ्ने पनि बताए । फरक प्रसँगमा बोल्दै उनले अहिलेको सरकारलाई असफल हुने छुट नभएको बताएका छन् । दुई ठूला दल मिलेर बनेको वर्तमान सरकार परिवर्तन हुने कुनै सम्भावना नभएकोले सरकारले राम्रो काम गर्नुपर्ने बताए ।