इङ्ग्ल्यान्ड हंगेरीसँग पराजित

वीरगन्ज,२२ जेठ । युईएफए नेसन्स लिग ए ग्रुप ३ को पहिलो खेलमा युरोकप उपविजेता इङ्ग्ल्यान्ड घरेलु टोली हंगेरीसँग पराजित भएको छ । बुढापेस्टमा गएराति भएको खेलमा इङ्ग्ल्यान्ड हंगेरीसँग १–० ले पराजित भएको हो । डोमिनिक सोबोस्लाईले दोस्रो हाफमा पेनाल्टीमार्फत् गरेको गोल नै निर्णायक बन्यो । ६६औं मिनेटमा डोमिनिक सोबोस्लाईले पेनाल्टीमा गोल गर्दै टोलीलाई अग्रता दिलाए ।रिस जेम्सले जिसोल्ट नागीलाई फउल गरेपछि रेफ्रीले पेनाल्टी प्रदान गरेका थिए । एक गोलले पछि परेको इङ्ग्ल्यान्डले त्यसपछि लगातार आक्रमण बुनेपनि सफलता हात पार्न नसक्दा स्तब्ध बन्न पुग्यो । यो जितसँगै हंगेरी लिग ए ग्रुप ३ मा ३ अंक जोडेर शीर्ष स्थानमा रहेको छ । पराजित इङ्ग्ल्यान्ड चौंथो स्थानमा रहेको छ । समान एक अंक जोडेर जर्मनी र इटाली दोस्रो र तेस्रो स्थानमा रहेको छन् ।