एक वर्षमा पाकिस्तानमा १४ पटक बढ्यो विद्युत् महशुल
पाकिस्तानमा एक वर्षको अवधिमा विद्युत् महशुल १४ पटक वृद्धि भएको पाइएको छ ।
पाकिस्तानको एआरवाई न्यूजका अनुसार सन् २०२३ जुलाईदेखि यसै वर्षको अगस्ट महिनासम्म विद्युत् महशुल १४ पटक वृद्धि भएको छ ।
पाकिस्तान पछिल्लो समय खराब आर्थिक अवस्थाबाट गुज्रिरहेको छ । १४ पटक विद्युत् महशुल बढ्दा त्यसबाट विद्युत प्रयोगकर्तालाई पारिवारिक खर्च व्यवस्थापन गर्न कठिन भएको छ ।
हालै विद्युत् महशुल कसले तिर्ने विवादका क्रममा गुर्जनवाला क्षेत्रमा एक जनाले आफ्नै भाइको हत्या गरेको समाचार सार्वजनिक भएको थियो ।
विद्युत् महशुलबापत बाँकी रहेको ३० हजार रुपैयाँ कसले तिर्ने भन्ने विषयमा विवाद बढ्दै गएपछि एक जनाले छुरा धसेर भाइको हत्या गरेको एआरवाईले उल्लेख गरेको छ ।
महशुल बढ्दा प्रयोगकर्तालाई ४५ करोड ५० लाख पाकिस्तानी रुपैयाँको भार थपिएको एआरवाई न्युजले जनाएको छ ।
हालै पाकिस्तानको राष्ट्रिय विद्युत ऊर्जा नियामक प्राधिकरणले विद्युत कर २.५६ प्रतियुनिट वृद्धि गरेको थियो ।
